كيف تستمتع بالحياة ؟

طريقة عمل جبنة للبيتزا لذيذة وموفرة

ناس كتير بيشتكوا لما يعملوا بيتزا فى البيت ان الجبنة بتنشف وساعات بتتحرق وتجلد – لكن كل المشاكل دى تنتهى بقراءتكم للطريقة المبتكرة اللى توصلت لها بعد تجارب عديدة – والنتيجة بيتزا غرقانة فى الجبنة السايحة  الطرية مثل كبرى سلاسل البيتزا العالمية ويمكن أحلى كمان – وفى نفس الوقت الطريقة دى حتوفر كتير فى الجبنة وخصوصا بعد الارتفاعات الكبيرة المتلاحقة فى اسعارها

المقادير

100جم جبنة رومى مبشورة
200جم جبنة شيدر مبشورة
450جم حليب (2 كوب)
10جم دقيق (معلقة كبيرة مش عالية قوى)
22جم زبدة او سمنة بلدى (معلقة كبيرة هرم)
معلقة صغيرة فلفل اسود
نصف معلقة صغيرة ملح

الطريقة

نضع الحليب والزبدة (او السمنة) فى حلة قعرها سميك – ثم ننثر الدقيق فوق الحليب ونقلبهم باستخدام مضرب سلك يدوى صغير على النار
نستمر فى التقليب حتى يغلى الحليب
بعد دقيقتين من الغليان نصب الجبن المبشورة ونقلب الكل حتى تسيح الجبنة وتختفى فى الحليب
الجبنة بالشكل دة بتكون سايحة ونقدر نصبها بسهولة على البيتزا فوق طبقة الصلصة – بس الصلصة نعملها ناشفة شوية مش طرية بحيث تلزق كويس فى العجينة قبل صب الجبنة السايحة فوقها وفردها بقعر معلقة

المقادير دى تعمل لك حوالى 800جم جبنة سايحة للبيتزا – يعنى بتضاعف كمية الجبنة اللى استخدمناها

أحلى صلصة هى ابسطها: ثلث كوب صلصة طماطم نقلبهم فى كوب مع ثلث كوب خل ومعلقتين كبار زيت دوار شمس ومعلقة صغيرة زيت زيتون ومعلقة كبيرة زعتر يونانى اخضر (اوريجانو) مطحون ونصف معلقة صغيرة من كل من: ملح صينى – فلفل اسود – بودرة ثوم – ملح

نقلب الخليط وندهن بيه وش العجينة بظهر معلقة قبل صب الجبنة السايحة فوقها